တဏှာဇော

သက်ရှိသတ္တ၀ါတွေမှာ လွန်ဆန်လို့မရတဲ့ စွဲလန်းမှုတဏှာက သိပ်ကြောက်ဖို့ကောင်းတာအမှန်ပါပဲဗျာ။ ဘယ်လောက် ကြောက်ဖို့ကောင်းသလဲဆို ကျနော့်အဖြစ်ကိုပဲ ကြည့်ပါလေ။ မိုင်ရာချီဝေးတဲ့ခရီးကို မနားတမ်း ပျံလာနေမိတာ အဲဒီစွဲလန်းမှု တဏှာကြောင့်ပေါ့။ မောပန်းမှုမရှိဘူးလို့ ပြောရမလားပဲ...။ မဟုတ်ဘူး တကယ်ဆို မောပန်းတာကို သတိမရတာ။

အခုကျနော် အိမ်ကိုပြန်လာနေပြီ။ကျနော့်ရဲ့ အတွေးအာရုံထဲမှာ ချစ်ဇနီးတယောက်ကလွဲရင် ဘာအသိမှ ရှိမနေဘူး။ အိမ်ကို မြန်မြန်ပြန်ရမယ်။ အိမ်မှာကျနော်သိပ်တွေ့ချင်တဲ့ ချစ်ဇနီးရှိနေတယ်။ ခရီးရဲ့အစမှာ သူတို့ကျွေးလိုက်တဲ့ အစာရေစာတချို့ကလွဲရင် ကျနော်အခုထိ ဘာမှမစားသေးဘူး။ စားဖို့အတွက် ပျံသန်း ခြင်းကို ခဏလေးနားလိုက်ဖို့တောင် အချိန်မပေးနိင်ဘူး။ ကိုယ့်တံတွေးကိုယ်မြိုချပြီး ပျံသန်းနေမိတယ်။ ဘာပဲဖြစ်ဖြစ် အိမ်မြန်မြန်ပြန်ရောက်မှဖြစ်မယ်။ ကျနော်သူ့အနားမှာနေရရင် သိပ်ပျော်တယ်။ ပြီးတော့ သူ့ကို စိုးရိမ်တယ်။

ကျနော်သာ အိမ်ပြန်နောက်ကျခဲ့ရင် ဒါမှမဟုတ် ခရီးလမ်းရဲ့တနေရာမှာ သေဆုံးခဲ့ရင်..... ကျနော်ဆက် မတွေးရဲဘူး။ ဘာတွေဖြစ်လာမလဲဆိုတာ ကျနော်သိနေတယ်။ ဘယ်တော့မှ မတွေးချင်ပေမယ့် အခုလို အိမ်ပြန်တဲ့အခါတိုင်း တွေးနေမိတာပါပဲ။ ပထမဆုံး ချစ်ဇနီးမျက်နာမြင်လာမယ်။ ပြီးရင်သူ့ဘေးနားမှာရစ်ဝဲ နေမယ့် ကျနော့်ရဲ့ ပြိုင်ဘက်ကို မြင်လာမယ်။ အဲဒီလို သူတို့မျက်နာတွေ မြင်ပြီးတိုင်း ကျနော်ရဲ့ ပျံသန်းမှုကို အရှိန်တွေမြှင့်မိတယ်...။

ကျနော်မှာ စွဲလန်းခြင်းရဲ့ တဏှာဇောတွေ ကပ်နေတယ်..။ အဲဒီဇောတွေနဲ့ပဲ အိမ်ကိုအမြန်ဆုံး ပြန်လာ နေမိတာပါ။ တဏှာဇောတွေကြောင့်ပဲ ကျနော်ဟာ ပိုင်ရှင်တွေရဲ့ ခိုင်းကောင်းတဲ့ သတ္တ၀ါတကောင် ဖြစ်လာတော့တယ်။ အဲဒီပိုင်ရှင်တွေ အကြောင်းတွေးမိရင် ကျနော်နာနာကျည်းကျည်း ဖြစ်မိတယ်။ ကျနော်ရဲ့ ပြိုင်ဘက်ဆိုတာလည်း တကယ်တော့ ကျနော်လို အသုံးချခံ သက်သက်ပါပဲလေ။

သက်ရှိတွေထဲမှာ ဥာဏ်ရည်အမြင့်ဆုံး လူတွေရဲ့အစွမ်းက ကြောက်ခမန်းလိလိပါပဲဗျာ။ ကျနော်လေ လူတွေနဲ့ဝေးတဲ့နေရာမှာ တကယ်ကို နေချင်ပါတယ်။ သူတို့ကျွေးမယ့်အစာကို အခန့်သားမစားရရင် နေပါစေ။ ဖြစ်သလိုရှာစားပြီး ကျနော်ဝေးဝေးမှာနေပါရစေ။ အခုအိမ်ပြန်ရောက်ရင် ကျနော်ရက်သတ္တပါတ် လောက်တော့ ချစ်ဇနီးအနားမှာ နေခွင့်ရမယ်။ ဒါပေမယ့် အချိန်တွေတဖြည်းဖြည်းကုန်လာလေ ကျနော့်ရဲ့ ငရဲခန်းက ရောက်ဖို့ နီးလာလေလေပါပဲ။ အဲဒီအကြောင်းတွေတွေးရင် ရင်ဘတ်က အောင့်အောင့် လာတတ်တယ်။ ငရဲခန်းနေ့ကိုရောက်ရင်လေ ကျနော်အဖြစ်က အရူးမီးဝိုင်းဆိုတဲ့ စကားထက် ပိုတယ်ဗျာ။

အသိဥာဏ်ရှိပါတယ်ဆိုတဲ့လူတွေ ဘာလုပ်ကြတယ်ထင်လဲ။ ကျနော်နဲ့ချစ်ဇနီးရဲ့ သာယာကြည်နူးတဲ့ ဘ၀လေးကို အတင်းအဓမ္မ ဖျက်ဆီးတယ်။ အဲဒီနေ့ရောက်ရင် ကျနော့်ကိုလှောင်အိမ်ရဲ့အပြင်ကို ထုတ်သွား ကြတယ်။ ပြီးရင်တော့ ကျနော့်ရဲ့ငရဲခန်း စတာပါပဲ။ လှောင်အိမ်ထဲမှာကျန်ခဲ့တဲ့ ကျနော့်ချစ်ဇနီးဆီကို ကျနော့်ရဲ့ပြိုင်ဘက်တကောင်ကို ထည့်ပေးလိုက်တယ်။ အဲဒီကောင်က ကျနော့်ချစ်ဇနီးနားမှာကပ်ပြီး ချစ်စကားတွေပြောနေတယ်။ မြင်နေရတဲ့ မြင်ကွင်းအတွက် ကျနော်လေ လုပ်ခွင့်တာရရင် အဲဒီကောင်ကို သတ်ပစ်ချင်လောက်အောင် မုန်းတယ်ဗျာ။

ဒါပေမယ့် ကျနော်လုပ်လို့ရနိင်တာက လှောင်အိမ်ကိုတပါတ်ပြီးတပါတ် ပြေးလွှားနေရတယ်။ ရင်ထဲမှာလည်း မီးတောက် နေတာပါပဲ။ လှောင်အိမ်အပြင်ကနေ ချစ်ဇနီးကို အားပေးနေရတယ်။ သူပြောတာမယုံဖို့။ မင်းအနားမှာ ကိုယ်ရှိနေတယ် ဆိုတာတွေ အဆက်မပြတ်ပြောရင်း ကျနော်အရူးတပိုင်းနဲ့ တပါတ်ပြီးတပါတ် ပြေးလွှားနေရတယ်။ ပြိုင်ဘက်ကလည်း သူ့တာဝန်ကို အင်မတန်ကျေတယ်ဗျာ။ ကျနော့်ချစ်ဇနီးကို အတင်းကြီးကို လိုက်ကပ်နေတာပါပဲ။ ကျနော့်ရဲ့ အရူးတပိုင်း ဖြစ်နေပုံကို ပိုင်ရှင်ဖြစ်တဲ့လူတွေက ကြည့်ရတာ ကျေနပ် သွားကြပြီဆို ကျနော့်ကိုလှောင်အိမ်ထဲ ပြန်ထည့်ပြီး ပြိုင်ဘက်ကိုပြန်ထုတ် လိုက်ကြတယ်။

ကျနော်လေ လှောင်အိမ်ထဲရောက်ရောက်ချင်း ချစ်ဇနီးအနားကို အငမ်းမရပြေးသွားတော့တာပါပဲ။ အခုနက ကျနော် စိုးရိမ်လိုက်ရတာတွေကို ရင်ဖွင့်ပြောပြတယ်။ ချစ်ဇနီးနဲ့လည်ချင်းယှက်ပြီး အမောတွေ ဖြေနေရတယ်။ ဒါဟာ ကျနော့်အတွက် အိမ်မက်ဆိုးဆိုတာထက် ပိုတယ်ဗျာ။ ဘယ်တော့မှ မကြုံချင်ပေမယ့် ခဏခဏတွေ့ကြုံနေရတာပါပဲ။ ဒီလိုမျိုး ပိုင်ရှင်တွေဘာကြောင့် လုပ်တယ်ဆိုတာ ကျနော်သိတာပေါ့ဗျာ။ မင်းအချိန်မှီပြန်မလာရင် မင်းဇနီးကိုအဖော် အသစ်ရှာပေးမယ်ဆိုတဲ့ သဘောကို ကျနော်သိအောင် ပြတာလေ။ ဒါကြောင့်လည်း ကျနော်ရောက်တဲ့ နေရာကနေ အိမ်ကို အမြန်ဆုံးပြန်လာရတာပဲ မဟုတ်လား။

ကျနော့်ကို ချစ်ဇနီးအနားမှာ ခဏနေခွင့်ပေးတယ်။ ပြီးရင် အစာရေစာကို၀၀လင်လင်ကျွေးပြီး ပိုင်ရှင်တွေက ကျနော့်ကို  အပြင်ပြန်ထုတ်ကြပြန်တယ်။ ပြီးရင် ကျနော့်ကိုမျက်နာသုတ်ပုဝါ အသေးစားလေးနဲ့ ဖွဖွလေးပတ် လွယ်အိတ်ထဲထည့်ပြီး ဟိုးအဝေးကြီး တမြို့တရွာကို ကားကြုံနဲ့ပို့လိုက်ကြတော့တယ်။ အဲဒီအရပ်ကို ရောက်ပြီဆိုရင် ကျနော်ကို အစာရေစာကျွေးတယ်။ ပြီးရင် ကျနော်ခြေထောက်မှာ စာရွက်လိပ် လေးချည်ပြီး ပြန်လွှတ်ပေးလိုက်ကြတယ်လေ...။

အဲဒီစာရွက်ထဲမှာလား... ကျနော်တို့လိုသတ္တ၀ါတွေနဲ့ ဘာမှမဆိုင်တဲ့ လက်ရှိကုန်စည်တွေရဲ့ နောက်ဆုံး ဈေးနှုန်းတွေ ပါတယ်လေ။ ဘာပဲဖြစ်ဖြစ်လေ စာရွက်ထဲမှာ ဘာတွေပဲပါနေပါစေ ကျနော်သိတာက အိမ်ကိုမြန်မြန်ပြန်ရမယ်။ ကျနော် သိပ်ကြာသွားရင် ကျနော့်ချစ်ဇနီးအတွက် စိုးရိမ်ရတယ်။ ကျနော်နောက်ကျနေရင် ဟိုတစ်ကောင်ကို ချစ်ဇနီးရဲ့လှောင်အိမ်ထဲ ထည့်ပေးလိမ့်မယ်။ အဲဒီလိုဖြစ်မှာ ကျနော် သိပ်ကြောက်ပါတယ်။  အဲဒီဇောနဲ့ကျနော် မိုင်ရာချီခရီးကို အမြန်ဆုံးနှုန်းနဲ့ရောက်အောင် ပျံနိင်တော့တာပါပဲ။  “ဇော” အဟုန်ကြောင့် ကျနော့်ရဲ့ အတောင်ပံခတ်နှုန်းတွေကို ဘေးကနေ တယောက်ယောက်ကြည့်မယ်ဆို အတောင်ခတ်နေတာကို ရှင်းရှင်းလင်းလင်းမြင်ဖို့ မလွယ်နိင်ပါဘူးလေ..။ တဖျတ်ဖျတ်နဲ့ တောင်ပံခတ်သံတွေ ကျနော့်ရဲ့ အပြန်လမ်းမှာ ဆူညံနေတာပါပဲ။

အမြန်ဆုံးနှုန်းနဲ့ ကျနော်အိမ်ပြန်ရောက်ပြီဆို တာဝန်ကျေပြီလေ။ ပိုင်ရှင်တွေက ကျနော့်ခြေထောက်မှာ ချည်ပေးလိုက်တဲ့ ကုန်စည်ဈေးနှုန်း စာရွက်ကိုကြည့်ပြီး အ၀ယ်ဒိုင်တွေနဲ့ အလုပ်ဆက်လုပ် နေကြပေမယ့် ကျနော်ကတော့ ချစ်ဇနီး အနားမှာ ကြည်ကြည်နူးနူးနဲ့ အမောဖြေနေရတယ်..။ ကျနော်နေချင်တာလည်း သူ့အနားမှာပဲ မဟုတ်လား။ ဒီလိုမျိုးနဲ့ပဲ ကျနော်တို့ရဲ့ အတောင်ပံတွေ မညောင်းမချင်း ကျနော်တို့ရဲ့စွမ်းအားတွေမကုန်မချင်း လူတွေကို အလုပ်အကျွေးပြုရတာပါပဲ။ လူတွေက စွဲလန်းခြင်းတဏှာကိုအသုံးချပြီး ကျနော်တို့ရဲ့ စွမ်းအားတွေကို ထုတ်ယူသုံးစွဲနေကြတာပဲလေ...။ ခင်များတို့ ကြားဖူးမှာပေါ့ ဘိန်းကျွေးပြီး လိုသလို ခိုင်းတာမျိုးတွေပေါ့။ ကျနော်တို့ကိုတော့ စွဲလန်းခြင်းတဏှာနဲ့ အသုံးချကြတယ်လေ။

ကျနော်တို့လို စွဲလန်းခြင်းအမျိုးမျိုးနဲ့ အိမ်ကိုအမြန်ပြန်ပေမယ့် အိမ်ပြန်မရောက်လာတဲ့ ဘ၀တူတွေလည်း အများကြီး ရှိတာပါပဲ။ ကျနော်တို့ထက် အင်အားကြီးတဲ့ စွန်တွေ သိန်းငှက်တွေရဲ့ အလစ်အငိုက် ဖမ်းယူစားသောက်ခြင်းကို ခံကြရတယ်။ ဘယ်အချိန်မှာများ ကျနော့်ကျောပေါ်ကိုရော လက်သည်းချွန်ချွန်တွေ ရောက်လာမလဲ ...။ ကျနော်မသိပါဘူး။ လမ်းခရီးမှာ ကျနော်တို့ သေဆုံးသွားတဲ့အခါ ကျနော်တို့ရဲ့ ချစ်ဇနီးမယားတွေကို ကြင်ဖော်အသစ်တွေ ထပ်ထည့်ပြီး အသုံးချခံ တဏှာသားကောင်တွေအဖြစ် ထပ်ပြီးလေ့ကျင့်ကြပြန်တယ်လေ။ အဲဒါတွေ တွေးမိရင် ကျနော်နာကျင်တယ်..။ အခုတော့ ကျနော်တို့ရဲ့ ကျောပေါ်ကို လက်သည်းချွန်တွေ မရောက်လာမချင်း ကျနော်တို့ရဲ့ အတောင်ပံတွေ မညောင်းမချင်း လူတွေကို အလုပ်အကျွေး ပြုနေရအုံးမယ် မိုင်ထောင်ချီပျံနေရ အုံးမှာပါပဲလေ..။

ကျနော်တို့တွေ ကိုယ့်အိမ်ကို ဘယ်လိုမှတ်မိလည်း ခင်များတို့ သိပ်သိချင်နေမလား...။
အဲဒါကိုက ကျနော်တို့ရဲ့ စွမ်းရည်ပါပဲ။ ဘယ်နေရာရောက်ရောက် ကိုယ့်အိမ်ကိုယ် မှတ်မိကြတာပါပဲ။
ဒါကြောင့်လည်း ကျနော်တို့က စာပို့ ခို တွေအဖြစ် နာမည်ကြီးနေတာပဲ မဟုတ်လား....။

ဖြစ်နိင်ရင် လူတွေနဲ့ဝေးဝေးမှာ နေချင်ပါတယ်လေ။

.........................................................................................................။

(ကိုသုနြေ္ဒ ပြောပြတဲ့ လွန်ခဲ့တဲ့ နှစ်ပေါင်း လေး ငါး ဆယ်က မြန်မာပြည်ရဲ့ ဆက်သွယ်ရေးကဏ္ဍမှာ ပါဝင်ခဲ့တဲ့ စာပို့ ခို တွေကို လေ့ကျင့်ခိုင်းစေခဲ့တဲ့ အဖြစ်လေးပါပဲ။ ဗဟုသုတလေး ပြောပြပေးတဲ့ ကိုသုနြေ္ဒကို ကျေးဇူးတင်ပါတယ်)